URA DOMOĆE POEZIJI Z ROBERTO RAZZI

18.1.2013. // Labin.com // Objavljeno u kategoriji Društvo

Aj, ca je to? Ma ki je to bi poli nas, va naše miće škole na Katurah, va cetrtak na 19. božićnjaka 2012. leta?

Vero, jena vesela i pametna šinjora, naša domoća pjesnikinja Roberta Razzi.

Ma ca nan je gonala? Zoc nan je gonala?

Gonala je koko domoće besedi robi znat i zapoštat, koko labinjonsko poezijo va srce imet. Prežentala nan je svoj libret „Kalendaj" i navadila nas koko se zovejo meseci va jenemu letu. I navadili smo...

 

Antošnjak - prvi mesec ki je dobi ime po Svetemu Antonu ki cuva blogo;

Sičanj - drugi mesec kada treba drevo poseć;

Morac - treti mesec kada tići kantojo;

Avril - cetrti mesec, mesec od odori i loži;

Moj - peti mesec, najslaji mesec od fraguli i crešnji;

Pomajić - šesti mesec, štajon od šandalah i gumarići;

Žetvenjak - sedmi mesec kada treba požet cenico i kada gremo plavat;

Angošt - osmi mesec, mesec od fešti i tonci;

Šetembar - deveti mesec, mesec kada finjeva leto i treba poć va školo;

Otobar - deseti mesec, mesec od pecurbi, kunji i kostanji;

Martinšćak - jedanajsti mesec kada na gusto pada doš;

Božićnjak - dvanajsti mesec, mesec od regoli i mirakul.

 

I ca na kraje još reć? Bilo nan je joko, joko lepo... Jena vesela i živa ura va škole ke ćemo se si spametit, jedon lepi regol za Božić.

Velo velo fala našoj Roberte Razzi ca je bila s nami i ca nan je se to prežentala.

 

OŠ Ivo Lola Ribar

oš ivo lola ribar roberta razzi

---