Lis bratu va New York: Ca si nas zobi?
8.8.2008. // Barkun // Objavljeno u kategoriji Zabava
Lepi moj brat, ca si nas zobi dase toliko dugo ne jovljaš? Naša mama koko mama, vajka je va strohe da ti se co ne strefi, ti si bi najmlaji va fameje, pa je vajka jimela stroha zote. Već kada ne pridivaš doma, da te malo vidimo, almeno biš se sako toliko moga jovit s telefonom, a ne bi bilo ni slabega da nan pošalješ lis i va njemu ka dolar. Je, da je va zadnje vreme na vele kure, pak je se tanji, ma mene se dolari puno već pježojo nego euro, a da našo kunelico nanke ne spomenen.
Siguro te intereso ko je doma poli nas? Mi smo ku te intereso, fala bogu, si zdravi i na broje, samo ca mama saki don hodi poli mediga, a ćaća je juštro priša od ošpidola kamo se ja prontivan. Vo leto son bi samo jedonput plavat va Rabac perke je toliko turisti i vas Merikani da zome ni mesta na parkeđe, a nanke na đirine. Ma sejno mi ni slabo, perke je naš sused napravo bazen, pak gren sako toliko poli njega na mižol domoćega, a malo i zaplavan kada neso mu turisti va kuće.
Znoš sada se si poli nas i na sele bave turizmon, pak se već i va Sveten Martine deboto više cuje tedeški i engliski nego naš zajik. Ja son ti zobi reć pokle se va Sveten Martine više ne igro balun, nego samo va Svete Nedelje, so nan zaparli i oštarijo, pak na forco moran špurat ii poć poli suseda.
Bi son cera i va Labine poli mediga, pak son se šo prošećat va stori grod. Son cu da ste vi Merikani prišli munjeni zad storen kroje, pa vas je sako leto se već doma preko leta, ma ne grete radi va svoje selo, nego si kupivate apartamenti va Rapce. Koko tamo ni više mesta za hi zidat oni se zidaju jušto va storen grode, a koko je je von vela preša za hi kupit prava da je naš sindako Tulijo pusti da se zidaju i kada so turisti va storen grode, samo koko bi vas kontento. A kada se zmešajo kamijoni od zidora, lokalne korijeri i naše i furešte vituri to pride takov kažin na crće, da ti se paro koko da si va New Yorke. Ti gušti moraš parvat, ma ku prideš k leto doma nemoj prit prez nove i vele vituri, perke bi te i naši i tvoji gledalo malo spoda oka. Samo da vidiš se kokove vituri z merikonskemi targi peljojo po našeh cestah?
Bi vero bilo dobro da prideš doma drugo leto, pa da vidiš koko je non lepo. Nimamo beci koliko bimo oteli, ma ni se va becah! Imamo nove cesti, nove butigi, supermarkati, nojde se i ka nova fabrika, fešti na saken korake. Si cu da se poli nas prodi više vituri nego libreti? Eko, i za se to je zaslužan na podeštot Demetlika. On se radi ne foli, više ga pježo da ga drugi fole, a joko je i ščercoz. Pravi da je va pasaneh let moga storit puno više, da ni kontenat sa sobon, da je, ko ćemo reć za sprovega, po na ispite, pa bi za pokoru mora bit još četire leta podeštot od Labina, da bi rivo storit se ono ca je narodu obećo pred izbori.
Si vide da si osto doma koko i ja, sada ne bi te bolega globa ku ćeš glasat za Obamo, nego biš sa kuntenat do svoj glos za Demetliko, ka je za pocetak sebe i svojemi preteli stori Ameriko, a za cetire leta bi je stori za seh nas.
Za sada toliko.
Radi te se spameti tvoj brat
Joče Pahljin
Labinjon Labin pismo cakavica beseda