LIS BRATU VA NEW YORK: Gremo napred vanjingajeć! - CA JE?

6. rujan 2010.

Šćorice - LIS BRATU VA NEW YORK: Gremo napred vanjingajeć! (11.1.2009.)

Lepi moj brat,
mi udeka va Labinšćine, ma anke va Istre i cele Hrvoske gremo pomalo napred vanjingajeć, a se šperon da ste i vi va Merike tu nedere. Koko se to gre napred mi Labinjani se dobro kapimo, a ca moremo onen ki so đelosi na naš lepi zajik. Non so se vajka smejali koko to gonamo, i to ne samo oni preko Uški, nego i drugi Istrijani, ma mene ni bilo nidar sron gonat ono kokome je navadila mat. I koko so vajka naši stori gonali. Sada anke nekemi poci nas zajik, ma ja ni tu ne moren pomoć. Ku treba mi dvo moremo zajno gonat i po vlaški, koko gonajo drugi vokole nas, ma neka oni parvojo gonat koko mi Labinjani? Zajno ćemo hi prepoznat da neso naši, a da bi se navadili štabilo gonat morajo puuuuno let živet poli nas i jimet radi naši šesni ljudi.

Vi va Merike gonate bolje po nase nego mi, magari jimate se već ingliskeh besid, ma so van besedi konzervane, perke se si zajiki kambijivajo. Neznon ku ti je poznato da puno noveh besid ki se sada nopet koriste va hrvosken zajike mi gonamo od vajka, a va storeh hrvoskeh libreti son noša ne samo naše domoće besedi koko ca so uhitit i stožar, nego anke i munjen, šesan, plešiv, nenavidan, postoli, vlosi i druga. Tebe ne treba gonat koliko se je lepeh libreti va zadnjeh tristi leta napisalo na našen zajike, ki je to Vinežon Daniel Načinović, a ka Katuronka Zdenka Višković-Vukić, ma son sigur da ne znoš ki je to Rašan Županić, ka je napiso pred jeno 30 let libret "Kova je nasa" na labinjonsken zajike. Za sada ti nećun reć ki je, samo moraš znat da on ni Slovenac koko se je neki don culo na Hrvosken radije, nego da je, Aršijon. Teh libreti je danas malo, jedon od njeh je i va mojeh rukah, a da bin ti pomoga da se spametiš o kemu se to dela šaljen ti prvo pađinu od njega.

Bi reć da smo mi Labinjani najveć nenavidni jedon na drugega, da nan je doma najtežlje i da štimomo više oni naši ljudi ki ća po svete nešto dobrega store. Neznon ku si cu za Duilija Belića? On ti je sa 25 let bi najmlaji direktor od fabriki Prvomajska kada je imela više od miljor delovci, i kada je delala za deboto celi svet. Pokle je šo va Prvomajsko va Zagreb, zad ten je bi vela batica va Zagrebačke banke, pokle je šo va neko drugo banko delat. I zoc ti se to pišen? Zato perke son cu na radije da je sada, skupa sa svojo ženo, jedon od najboljeh za delat ulje od uliki va lepe naše Istre, a to će reć i va cile državi. I ne samo to! Va pasano nedeljo son nopet na radije cu da je va Tolije, jedini od seh Hrvoti, dobili nagrado za njegova ulja od uliki ke tende nedere poli Puli! Mene je trdo drogo kada je neki naš Labinjon poznat po dobren, a to bi trebali bit i sen Labinjani. Magari ku je osto živet va Labine!

Ja, ja, deboto son zobi da si mi zadnji put piso da si osto prez dela, a da ti treba još por let do penziji, pa da neznoš ća da delaš. Pridi malo na gušće doma, kede nan almeno freške ariji ne fali, a još malo će pošnet šparogi, a ja hi još jiman va škrinje od pasanega leta. Sada je vreme od domoćeg kobasic i zarabenjaka, na stole je mlodo vino, ogonj poli ognjišća, pak ćeš nekakor pasat. A vidiš življenje tako i tako zajno paso, nidar se ne zno kada ćemo pšortit na ona svet.

Nego pustimo to. Se spametiš Rineta Cekodi od Vilit, ka sada živije va Švedske. I on ti je šo va penzijo, sada malo na gušće pridiva doma, pa son ga cera sre va kafiće va Mercatore, kede se gušće nojdivan svoji preteli. Kafić još dela nekakor, ma ljudi imajo se manje beci, a marketi je se već poli nas va Labine, pak trgovci neso preveć kontenti z prometon. Zato son cu da je Mercator obligova dvo delovci, a još da će hi do kraja meseca prez dela ostat njih pet.

Ma ca ja to tebe gonan, kada i ti i si mi jimamo svoji problemi. Eko, za sada toliko, a joko me intereso ku ćeš znat ki je to Rašan Županić!
Seh vas jima radi vaš

Bepi Presikor Ulitar

Tagovi: šćorice, cakavica, lis vratu va new york, bepi presikor, Marijan Milevoj

Upisao: EmZe | Izvor: